2018 йилнинг 1 июль ҳолатига кўра, Ўзбекистон умумий ташқи қарзининг ҳажми 2018 йилнинг боши билан таққослаганда бироз 0,02 фоизга ёки 3,4 млн. долларга кўпайган ҳолда, 15,8 млрд. долларни ташкил этди. Бу ҳақда ЎзА Марказий банк томонидан тақдим этилган ҳисоботига асосан хабар қилмоқда.
2018 йилнинг I ярим йиллиги учун қарздорликнинг ўсиши давлат секторига тўғри келмоқда (479 млн. долл.), шу билан бирга хусусий секторнинг қарздорлиги 476 млн. долларга камайди. Шундай қилиб, давлат ташқи қарзи давлат лойиҳаларини молиялаштириш учун янги қарз олишларни жалб қилиш ҳисобига ўсиш тенденциясини сақлаб қолди.
2018 йилнинг I ярим йиллигида хусусий сектор томонидан жами 298,6 млн. доллар миқдордаги ташқи қарз жалб қилинди. Қарзни жалб қилиш асосан банклар – 176,6 млн. доллар, улардан 110,6 млн. доллар – давлат улуши бўлган банклар, 24,3 млн. доллар – тўқимачилик соҳаси корхоналари ва 63,9 млн. доллар – иқтисодиётнинг бошқа секторлари корхоналарига тўғри келади.
Шунингдек, 2018 йилнинг I ярим йиллигида 686,3 млн. доллар миқдордаги асосий қарз ва 176,6 млн. доллар миқдордаги фоизларнинг тўлови амалга оширилди. Бунда асосий қарзни сўндиришнинг сезиларли ҳажми нефть, газ ва энергетика сектори (446,5 млн. доллар), шунингдек, банк (107,9 млн. доллар) ва телекоммуникация сектори (103,8 млн. доллар)га тўғри келмоқда. Нефть, газ ва энергетика сектори корхоналари томонидан 148,8 млн. доллар миқдордаги фоизлар тўланган эди.
