Ташриф давомида давлатимиз раҳбари Чуст туманидаги “Chust textile” хусусий корхонасига борди. 1,3 минг киши меҳнат қилаётган ушбу корхона “Наманган” эркин иқтисодий зонасида ташкил этилган. У ерда барча турдаги устки ва ички кийимлар ишлаб чиқарилади. Корхона 2020 йилда қарийб 2 минг тонна мато ва 5,2 млн дона тайёр трикотаж маҳсулотлари ишлаб чиқарган. Маҳсулотлар Италия, Россия, Қозоғистон ва Тожикистон каби давлатларга 9 миллион доллардан зиёд экспорт қилинди. Бу йили эса ушбу кўрсаткични 12 миллион долларга етказиш режалаштирилган. Президент корхонадаги иш жараёнини, тайёр маҳсулотларни кўздан кечирди.
- Илгари эгилиб пахта экардик, эгилиб терардик, лекин бошқа давлатларни боқардик. Охирги йилларда яратилган имкониятлар туфайли янги корхоналар пайдо бўляпти, тадбиркорлар эмин-эркин ривожланяпти, қайта ишлаш даражаси ошяпти. Кластерлар тузиб, пахтани эгали қилганимиз учун унинг сифати ҳам ўзгараяпти. Пахта сифатли бўлса, тадбиркорга осон бўлади, маҳсулоти сифатли, рақобатбардош бўлади, - деди Шавкат Мирзиёев.
Мазкур корхона лойиҳасининг умумий қиймати қарийб 12 миллион доллар бўлиб, уч босқичга мўлжалланган. Тўлиқ қувватда йилига 5 минг тонна мато, 15 миллион дона тайёр маҳсулот ишлаб чиқариш мумкин бўлади. Ишчилар сонини 2200 га етказиш режалаштирилган.
