Маълум бўлишича, ҳоким ушбу мулоқот давомида янгича солиқ жорий этишни таклиф қилган. Ҳоким пойтахтда кўплаб тадбиркорлар аниқ режаси бўлмай туриб, 2-3 млрд.лаб кредит олаётганини, лекин иши энди йўлга қўйилаётганда кредитни қайтариш муддати келаётгани ва иши орқага кетаётганини таъкидлаган.
Биз шуларга таклиф қилаяпмиз, кредит олишга шошилманглар, ишни ижарада туриб бошланглар, биз керак бўлса ижарага ёрдам берайлик, деяпмиз. Энди, муҳтарам президент, бу жараёнда бизга ёрдамингиз керак. Ҳозир қурилаётган кўплаб кўп қаватли уйларнинг, ундан ташқари олдинги уйларнинг биринчи қаватларининг кўп қисми бўш ётибди. Уларнинг эгаларига бинони ижарага беришни таклиф қиламиз. Агар ўзи 6 ойдан ортиқ фойдаланмаса ёки ижарага бермаса, прогрессив [оширилган] солиқ қўллаймиз. Ахир бино қурилганидан кейин фойдаланилиши керак-ку. Шундай қилсак, пойтахтда ижара нархлари тушади, тадбиркорларга ҳам кенг имкониятлар яратилади, – деб таклиф билдирган Ортиқхўжаев.
Давлатимиз раҳбари ушбу таклифни маъқуллаб, ўша ернинг ўзида топшириқ берган ва бу бўйича 1 йиллик Тошкент тажрибасини қилиб кўриш кераклигини, агар муваффақиятли бўлса, бошқа ҳудудларда ҳам қўллаб кўрилишини таъкидлади.
Бунинг учун қонунчиликка ўзгартириш керак бўлса ёки президент қарори зарур бўлса, таклифларни беринглар, мен қўллаб-қувватлайман, – деди Шавкат Мирзиёев.
