Май ойида Хитойнинг BYD автоконцерни Ўзбекистонда электромобиллар ва электробуслар ишлаб чиқариш қўшма корхонасини яратиш имкониятларини ўрганади.
Бу ҳақда АИМКда “Ўзавтосаноат” аксиядорлик жамияти, Транспорт ва энергетика вазирликлари ҳамда бошқа масъул ташкилотлар мутасаддилари иштирокида ўтказилган матбуот анжуманида маълум қилинди.
Тадқиқот асосида BYD бизнес-режани ишлаб чиқади. Кейин маҳсулот ишлаб чиқариш ва қўшма корхона ташкил этиш бўйича шартнома имзолаш режалаштирилган.
Хитой компанияси электромобиллар ва электробуслар ишлаб чиқаришдан ташқари, электромобил аккумуляторлари ва электр моторларига техник хизмат кўрсатиш тармоқларини яратиш ниятида.
Бу ҳақда “Ўзавтосаноат” бошқармаси бошлиғи Шафкатбек Алимов маълум қилар экан, мамлакатимизда электромобилларни қувватлантириш шохобчалари йўқлигини таъкидлади. Ўзбекистонликлар 2000 дан ортиқ электр транспорт воситаларидан фойдаланишига қарамай, бор-йўғи 36 та юқори волтли зарядловчи стансиялар ишламоқда.
