Қашқадарёда ўғил отасини темир билан ўлдириб, қудуққа ташлаб юборди. Бу ҳақда жиноят ишлари бўйича Қашқадарё вилояти судининг судьяси Фозил Юсупов хабар қилди.
Шуҳрат Нурматов (исм-шарифлар ўзгартирилган) отаси Аҳмад Нурматовнинг қотилига айланган. Судьянинг маълум қилишича, Шуҳратнинг Марям исмли онаси, Озодбек исмли укаси ва Наргиза исмли синглиси бор. Улар аввалига бир оила бўлиб аҳил умр кечиришган. Лекин орада келишмовчиликлар сабаб онаси Марям қизи Наргизани олиб ота уйига кетиб қолган ва шу тариқа оилага дарз кетган. Шуҳрат ва Озодбек эса отаси билан яшаб келган.
Кунларнинг бирида Шуҳрат фермер хўжалигида ишлаб, ойлигни буғдой кўринишида олади ва ана шундан сўнг барча воқеалар бошланади. Шурат буғдойни олгач уни уйида қолдириб, Самарқандга ишлагани кетади. Ишлаб юрган вақтда эса отаси унга қўнғироқ қилиб буғдойни сотиб юборишни айтади. Шундан сўнг Шуҳрат онаси билан отасининг уйига буғдойни олиб кетгани келади. Шуҳратнинг отаси онасини кўргач жаҳли чиқади ва буғдойни бермаслигини айтади. Ушбу ҳолатдан сўнг орага маҳалла раиси ва профилактика инспектори аралашади ва шундан сўнггина отаси буғдойни олишга рухсат беради. Лекин ота фақатгина Шуҳратга уйга киришга рухсат беради, онасини эса кўчада қолдиради. Шуҳрат буғдойларни йиғиб, қопларга солаётганда эса отаси келиб уни силтаб ташлйди. Шу вақт Шуҳрат атрофда ётган таёқни олиб отасини уриб ташлайди. Кўчадан онаси келиб уларни ажратади ва Марям, Шуҳрат, Озодбек отани ичкарига олиб киради. Марям бу орада Шуҳратга отангни ортиқ урма, дея ташқарига чиқиб кетади. Кўзи қонга тўлган Шуҳрат укасини алдаб кўчага чиқариб юборади ва отасини темир билан уради. Аҳмад воқеа жойида темир зарбидан ҳалок бўлади.
Шуҳрат ўз қилмишини яшириш мақсадида арқонни олиб отасининг бўйнидан ўтказиб, тинмай йиғлаётган укаси Озодбекни ёрдамга чақириб, суви қуриб қолган қудуққа ташлаб юборади. Укасини эса тинчлантиришга уриниб, бу ҳақда ҳеч кимга айтмасликни, акс ҳолда қамалиб кетишини билдириб, жим юришни сўрайди. Шуҳрат укасига шунингдек, отасининг уларга ҳамда онасига етказган азоби учун шу йўл билан қасос олганини ҳам айтган.
Суриштирувлар натижасида Шуҳратнинг айби исботланган ва у узоқ муддатга қамалган. Марямга эса енгиллаштирувчи ҳолатларга кўра озодликни чеклаш жазоси тайинланган.
