Андижонда светофор тўсинига чиқиб ҳокимни чақириб беришни талаб қилган фуқаро 15 суткага қамалди. Бу ҳақда ҳуқуқ тартибот органлари хабар қилди.
Маълум бўлишича, воқеа 6 июнь соат 10:00 ларда содир бўлган. Эркак ҳуқуқ тартибот органлари ходимларининг талабларини бажармай светофор устинига чиқиб олиб, ҳақоратли сўзлар ишлатиб, вилоят ҳокимини чақириб беришни талаб қилган. Эркакнинг бундай йўл тутишига 15 кун олдин уйи "снос"га тушгани ҳақидаги хабар сабаб бўлган. Фуқаро светофордан пастда ёйиб қўйилган сеткага жароҳатларсиз сакраган. Пастда эса унинг спиртли ичимлик ичгани маълум бўлган.
Унинг ушбу ҳаракати Андижон вилоят маъмурий судида кўриб чиқилган. Унга кўра эркакка МЖтКнинг турли моддаларига кўра 15 сутка маъмурий қамоқ ва умумий ҳисобда базавий ҳисоблашнинг уч баравари миқдорида жарима жазоси тайинланган.
