Аввалроқ сайтимизда Ўртасаройдаги карантин марказида 42 ёшли фарғоналик фуқаро ўзини осиб, жонига қасд қилгани ҳақида ёзган эдик.
Бош прокуратура ушбу ҳолат бўйича расмий маълумот берди. Хабар қилинишича, ушбу фуқаро шу йил 15 июнь куни Россиядан чартер рейс орқали келган ва Ўртасаройдаги карантин марказига олиб келинган.
Фуқаро ўша куннинг ўзида коронавирусга таҳлил топширган. Кейинчалик у 4 нафар шахс бўлиб бир хонага ётқизилишга йўл қўймай, ўзини касаликка чалинганини айтиб, жанжал кўтарган. Шундан сўнг у алоҳида хонага олинган. Фуқаронинг бундай ҳаракат қилганини шифокор ҳам тасдиқлаган. Шифокорнинг айтишича, фуқаро алоҳида хонага олинган, у карантин марказига олиб келингандан сўнг овқат ҳам емаган. Шунингдек, у 16 июнда психиатр кўригидан ҳам ўтган.
Лекин фарғоналик фуқаро 20 июнь куни карантин марказида ўзи ётган хонага ўрнатилган кондиционернинг ташқи томондаги паррагига чойшаб билан номаълум сабабларга кўра ўзини осган.
Ҳозирда ушбу ҳолат бўйича Юқоричирчиқ туман прокуратураси томонидан терговга қадар текширув ҳаракатлари олиб борилмоқда.
Жонига қасд қилган фуқарода коронавирус аниқланмаган.
