Фарғонада ички ишлар ходими қўшмачи аёлдан пул ва жинсий алоқа сўради. Бу ҳақда Жиноят ишлари бўйича Фарғона туман судининг раиси Фарруҳ Абдураимов хабар қилди.
Маълум бўлишича, шу йил 19 апрел куни ўтказиган тезкор тадбирда Фарғона шаҳридаги уйларнинг бирида фоҳишалик қилишга шароит яратиб берган, аввал одам савдоси бўйича судланган аёл ушланган. Уни ушлаш жараёнида иштирок этган ички ишлар ходими кейинчалик ушбу аёлдан тергов жараёнида қамоққа олинмаслиги учун терговчи билан гаплашиб беришини, бунинг ҳаққи 2 минг доллар бўлишини айтади. Шундан сўнг ходим аёл билан навбатдаги учрашувда уни ёқтириб қолганини айтиб, жинсий алоқа ҳам таклиф қилади. Аёл ушбу шартга кўнади ва ички ишлар ходими билан кўнгилхушлик қилиб юради.
Ходим шу йил 1 майдаги учрашувда тергов 3 ой, суд жараёни ҳам 2 ойча давом этишини айтиб, агар ушбу вақт орасида аёл ҳомиладор бўлиб қолса судда унга анча енгил бўлишини айтади. Шундан сўнг аёл ходимнинг ҳаракатларидан шубҳалана бошлайди ва бу ҳақда ДХХга мурожаат қилади.
2020 йил 3 май куни аёл ходимга аввал айтилган пулни беришини айтиб олдига чақиради ва ходим хизмат машинасида айтилган пулнинг 1500 долларини олаётганда ушланади.
Фарғона туман судининг раиси Фарруҳ Абдураимовнинг маълум қилишича, ходимга нисбатан ЖКнинг 168-моддаси 3-қисми “а”-банди, 28,211-моддаси 1-қисми билан жиноят иши қўзғатилиб, кейинчалик озодликдан маҳрум қилиш жазоси тайинланган.
