Қаршида аввал «Жиҳодчилар» диний экстремистик оқимига аъзо бўлиб 2004-2018 йилларда жазоланиб, қамалиб чиққан 52 ёшли фуқаро ўзининг 16,14 ва 12 ёшли фарзандлари ҳамда 20 ёшли жияни ва турли ёшдаги 11 нафар фуқарони йиғиб, «жиҳодчилар» оқими ғояларини қўллаб-қувватлаб келган.
Гуруҳ етакчиси ушбу фуқароларни «ҳижрат» ва «жиҳод» қилишга, Сурияга бориб, «Тавҳид ва Жиҳод катибаси» террористик ташкилотига қўшилишга ундаган.
Шунингдек, ушбу фуқаро телеграмда ҳам «Шаҳидлар» номли гуруҳини ташкил этиб, у ерда «Абу Салоҳ», «Абдуллоҳ Зуфар», «Содиқ Самарқандий» ва бошқаларнинг «ҳижрат», «жиҳод» ва «шаҳидлик»ка чорловчи аудио-видео материалларини жойлаштириб, тарғибот ишлари олиб борган.
ДХХ томонидан олиб борилган тезкор тадбир давомди Қашқадаёрда ташкил этилган мазкур ноқонуний гуруҳ фаолиятига чек қўйилган.
Дастлабки тергов-суриштирув жараёнларида гуруҳ етакчисининг кўрсатмаси билан унинг аъзолари босқинчилик жиноятларини содир этиб, ушбу йўл билан “сафар”га кетиш учун ҳаражатларга пул йиғиб, кейинчалик Сурияга бориб, террористик ташкилотларга қўшилишни режалаштиришгани маълум бўлган.
Уларнинг уйларидан компьютер процессори, ноутбук, дрон, флеш-карталар, ДВД дисклар, телефон аппаратлари, диний мазмундаги адабиётлар, шунингдек, бир донадан ўқотар ва пневматик қурол, патронлар ва гильзалар ашёвий далил сифатида процессуал тартибда расмийлаштириб олинди.
Эътиборли жиҳати, гуруҳ аъзолари орасида МЧЖ раҳбари ва ишчиси, буюм бозорида сотувчилик билан шуғулланувчи шахслар ва институт талабаси ҳам бор.
Ҳозирда ушбу ҳолат бўйича ЖКнинг тегишли моддаси билан жиноят иши қўзғатилган, тергов ҳаракатлари олиб борилмоқда.
