Бухорода мансабдор танишига кам таъминланганлар учун қурилган уйни 4000 долларга олиб бермоқчи бўлди. Бу ҳақда Ўзбекистон24 телеканалида маълум қилинди.
Хабар қилинишича, Бухоро шаҳар ҳокимлигининг уй-жойларни ҳисобга олиш ва нотураржойлардан фойдаланиш давлат корхонаси бошлиғи ўринбосари ҳокимликдаги таниши орқали фуқарога кам таъминланган ва уй-жойга муҳтожлар учун қурилган уйлардан бирини 4000 долларга олиб бермоқчи бўлган. Мазкур уйлар шаҳар ҳокимлиги балансида бўлган. Мансабдор пулларни олаётган вақтда қўлга олинган. Қўшимча қилинишича, ушбу шахс аввал ҳам ЖКнинг 210-моддаси 3-қисми билан судланган бўлган.
Ушбу ҳолат юзасидан жиноят иши қўзғатилган ва ҳозирда тергов ҳаракатлари олиб борилмоқда.
