Аввалроқ сайтимизда Андижон вилоятида 25 ёшли аёл шаръий никоҳдаги 48 ёшли эрини ўлдириб, ҳожатхонага ташлаб юборгани ҳақида ёзган эдик. Дарё нашри Андижон вилоят суди судья катта ёрдамчиси Комроншоҳ Расуловдан воқеанинг бошқа тафсилотлари ва аёлга нисбатан ўқилган ҳукм ҳақида билиб олди.
Маълум бўлишича, аёл ва эркак 2019 йилнинг февраль ойидан буён яшаб келган. Ҳодиса эса 3 майда содир бўлган. Ўша куни эри хотинидан ғайритабиий усулда жинсий алоқа қилишни сўраган. Эркак агар аёли бунга рози бўлмаса уни уйдан ҳайдаб юбориш билан таҳдид қилган. Бундан эса аёлнинг жаҳли чиқиб, нафратланган. Бу орада эр ювиниш учун чиқиб кетган ва ўша вақтда аёл эридан қутилиш йўлини излай бошлаган. Эр ювиниб келгач аёл унинг таклифига рози эканини, лекин бошқача усулда бу ишни қилишни таклиф қилган. Шундан сўнг, аёл эрининг розилиги билан унинг қўли ва оёғини боғлаган ва оғзини рўмол билан ўраган. Кейинроқ эса олдиндан тайёрлаб қўйган этак матоси билан бўғган ва жони узулгунча ушлаб турган. Эртаси куни жасаднинг ҳиди чиқавергач аёл арра билан эрининг жасадини майдалаб, ҳожатхонага ташлаб юборган.
Ушбу ҳолат юзасидан бўлиб ўтган суд мажлисида аёл ЖКнинг 97-моддаси 1-қисми (Қасддан одам ўлдириш) билан айбли деб топилган ва 10 йилга қамалган. Шунингдек, суд аёлдан жабрланувчининг вакили Х.Қ. фойдасига 7 миллион сўм маънавий зарар ундирилиши лозимлиги ҳақида ҳам қарор чиқарган.
