Андижон вилоятида икки нафар 19 ёшли ўсмирлар босқинчилик содир этди. Бу ҳақда ҳуқуқ тартибот органлари хабар қилди.
Маълум бўлишича, улар шу йилнинг 24 август куни соат 22:30 да Асака тумани Отиш маҳалласи Қўрғонолди кўчасида истиқомат қилувчи 28 ёшли йигитнинг уйига юзларига ниқоб, қўлларига қўлқоп кийган ҳолда девор ошиб, бостириб киришган. Улар хонадон эгасини скотч билан боғлаб, уриб жароҳат етказган. Лекин уй эгаси шундай ҳолатда ҳам уларга қаттиқ қаршилик кўрсатган ва босқинчилар воқеа жойидан қочиб кетишган. Кейинчалик ҳуқуқ тартибот органлари ходимлари воқеага аралашгач, ашёвий далиллар ва босқинчилар топилган.
Ҳозирда улар ушланган. Ҳолат юзасидан эса ЖКнинг 164-моддаси 3-қисми “в” банди (босқинчилик) билан жиноий иш қўзғатилган. Тергов ҳаракатлари олиб борилмоқда.
