Бухоро вилоятида шу йил 27 апрелда кузатилган кучли шамол 141,6 млрд сўм зарар келтирган. Шундан сўнг ундан талофат кўрганларга президент топшириғига кўра фоизсиз кредитлар ажратилган.
Ҳуқуқни муҳофаза қилувчи органлар томонидан олиб борилган текширувларга кўра ажратилган кредитлар мақсадсиз фойдаланилган. Хусусан, «Ўзсаноатқурилишбанк» бош офиси ходими О.Т. ва мазкур банкнинг «Тўқимачилик» филиали бошқарувчиси А.Қ.лар ўзларининг номларидаги иссиқхонага 2 млрд сўмни ўтказиб олишган.
Маълум бўлишича, уларнинг иссиқхоналари содир бўлган кучли шамолдан ҳеч қандай зарар кўрмаган. Уларнинг найранги фош бўлгач, банкирларга нисбатан ЖКнинг 167-моддаси 3-қисми «а» банди (ўзлаштириш ёки растрата йўли билан талон-торож қилиш) билан жиноий иш қўзғатилган.
