Жиззах вилоятида эркак ўзи ва қизини ҳимоя қиламан деб, собиқ хотинини ўлдириб қўйди. Бу ҳақда ОАВда хабарлар тарқалди.
Ҳодиса Ғаллаорол тумани Гулистон қишлоғида Содир бўлди. 1990 йилда туғилган аёл 2010 йилда туғилган қизининг бошига тош билан ураётган вақтида аёлнинг собиқ эри келиб қолган. Эркак уйга келиши билан аёлни тўхтатишга уринган. Аёл эса бу орада ошхона пичоғини олиб, собиқ турмуш ўртоғини жароҳатламоқчи бўлган. Эркак ўзини ҳимоя қилиш мақсадида аёлнинг бошига тош билан урган.
Ҳодиса оқибатида аёл воқеа жойида ҳалок бўлган. Тош билан жароҳатланган 10 ёшли қиз эса шифохонага ётқизилган. Ҳозирда суриштирув ишлари олиб борилмоқда. Таъкидлаш жоиз, аёл 2019 йилда ҳам эркакка пичоқ билан ҳужум қилган. Ўшанда собиқ эр шифохонага ётқизилган ва ажрашишга ариза берган. Ҳозирча ўша вақтда аёл нима учун жазоланмагани маълум эмас.
