Жиззахда босқинчилик жинояти содир этилди. Бу ҳақда ҳуқуқ тартибот органлари хабар қилди.
Маълум бўлишича, шу йил 12 сентябрь куни Жиззах шаҳри Халқобод маҳалласида яшовчи 48 ёшли аёлнинг уйига уч нафар ниқоб таққан шахслар уй деворидан ошиб тушган. Улар уй бекаси, унинг 22 ва 3 ёшли қизларини қўрқитиб, пул талаб қилган. Натижада босқинчилар уйдан 207 минг доллар ва турли хил тилла буюмларни олиб кетишган. Хонадон эгасига босқинчилар 267 минг доллар зарар етказган. Шундан сўнг аёл ҳуқуқ тартибот органларига мурожаат қилган. Тезкор тадбир давомида ушбу жиноятни содир этганлар аниқланган. Улар Тошкент шаҳри ва вилоятида яшовчи 5 нафар 27-25 ёшли йигитлар экани аниқланган.
Таъкидлаш жоиз, ушбу аёлнинг уйида шунча миқдорда тақинчоқ ва пуллар борлигини жиноий гуруҳ аъзоси, Тошкент шаҳри Сергели туманида яшовчи 24 ёшли А.Х. олдиндан билган. У аёлнинг 22 ёшли қизи билан бир муддат шаръий никоҳ асосида яшаган бўлган. Йигитларнинг барчаси ушланиб, ҳибсга олинган. Ҳозирда тергов ҳаракатлари олиб борилмоқда.
