Наманганда МИБ ходимларига норозилик билдириб, ўзини ёқиб юборган аёл вафот этди. Бу ҳақда ОАВда хабарлар тарқалди.
Маълум бўлишича, 35 ёшли аёл суд қарорига кўра ўзи яшаб турган уйдан чиқиб кетиши керак бўлган. Хабар қилинишича, аёлнинг онаси фирибгардан 13 минг долларга уй сотиб олиб, ўша уйда яшаб келган. Лекин уйни сотган одамнинг айби очилиб, унга озодликни чеклаш жазоси қўлланилган ва шундан сўнг уйнинг ҳақиқий эгаси тегишли идораларга мурожаат қилиб, уйини қайтариб олган. Уйда яшаб келаётган, фирибгар қурбони бўлган 35 ёшли аёл эса уйдан чиқмаслигини билдирган.
МИБ томонидан ҳолат юзасидан билдирилган муносабатда ходимлар суд қарори ижросини таъминлаш мақсадида, унинг уйига борганида уларга норозилигини билдириш учун, устига бензин сепиб ёқиб юборгани айтилган. Ҳодиса 29 сентярбь куни содир бўлган. Аёл 30 сентябрда 80 фоиздан ортиқ куйиш тан жароҳати натижасида шифохонада вафот этган. Ушбу ҳодиса юзасидан Наманган шаҳар прокуратураси томонидан терговга қадар текширув ҳаракатлари олиб борилмоқда.
