Тошкентда мушукни отиб ташлаган фуқаро 446 минг сўм жарима тўлайдиган бўлди. Бу ҳақда “Mehr va oqibat” ҳайвонларни ҳимоя қилиш жамияти хабар қилди.
Маълум бўлишича, ҳодиса октябрь ойининг ўрталарида содир бўлган. Миробод туманида яшовчи эркак қўшнисининг мушугини отиб ташлаган.
Мушук эгаси профилактика инспекторига мурожаат қилган. Лекин, инспектор эркакни судга бериш ўрнига, томонларни яраштиришга ҳаракат қилган. Шунга қарамай мушук эгаси адолат қарор топиши учун барча керакли ҳужжатларни (рентген ва ҳоказолар) тўплаган. Аёлга бу ишда ҳайвонларни ҳимоя қилиш жамияти юристлари ёрдам берган. Барча ҳужжатлар тўпланиб бўлгач, иш ўрганиш учун Муробод тумани ИИБга юборилган.
Унинг натижасига кўра иш судга ҳам ошириб юборилган. Суд қарорига кўра эркак ЭКИҲнинг 2 баравари (446 минг сўм) миқдорида жарима тўлайдиган бўлди.
