Ёшлар иттифоқи вакили ва маҳалла раиси дўстига 13 марта пичоқ урган болани қамамасликни сўради. Бу ҳақда Замон ИД хабар қилди.
Маълум бўлишича, Тошкентда иккита дўст бир бири билан уришиб қолган. 26 ёшли йигит дўсти, 23 ёшли У.А.дн қарзга олинган телефонни қайтаришни сўраган. Бунга жавобан эса У.А. 26 ёшли дўстини пичоқлаб ташлаган. Умумий ҳисобда унга 13 марта пичоқ урган. Йигит комага тушиб қолган ва мўжиза туфайли омон қолган. Жабрланувчининг онасининг айтишича йигит эндиликда ногирон бўлиб қолган (чап қўли ишламайди) ва унинг ичаги ҳамда умуртқаси шикастланган.
Ҳодиса юзасидан бўлиб ўтган судда У.А. уни кечиришларини, ҳодиса содир бўлган вақтда у шокда бўлганини айтган. Шунингдек, Ёшлар иттифоқи қошидаги ёш ҳуқуқшунослар кенгаши ва судланувчи яшайдиган маҳалла раиси ҳам суддан гумонланувчини очиқда қолдиришни сўраган. Суд қарорига кўра У.А. 5 йилга озодликдан маҳрум қилинган.
