Фото: Кун.уз
Қашқадарё вилоятида пиёда вафот этди. Пиёдани уриб юборган автомобил туман ҳокимига тегишли экани таҳмин қилинмоқда. Бу ҳақда Кун нашри хабар қилди.
Нашрнинг маълумотига кўра, 2020 йил 12 декабрь куни Косон шаҳрида кўп тармоқли марказий поликлиника ёнида ЙТҲ содир бўлган. ЙТҲ натижасида 60 ёшли пиёда Шерали Жумақулов вафот этган. Таъкидланишича, эркакни Каптива автомобили уриб юборган.
Жумақулов пиёдалар ўтиш йўлакчасида уриб юборилган. Марҳумнинг қариндошларининг бир нечта мурожаатларига қарамай ҳуқуқ тартибот органлари ходимлари тергов жараёни қандай кечаётган ҳақида маълумот бермаган.
Марҳумнинг ўғли Рустам Жўраев гувоҳлардан суриштириб, эркакни уриб юборган Каптива Косон тумани ҳокими Асрол Бойқораевнинг хизмат автомашинаси эканини аниқлаган. Ушбу иш ҳужжатида ЙТҲ содир бўлган вақтда автомобиль бошқарувида ҳокимнинг биринчи ўринбосарининг ҳайдовчиси бўлгани айтилган. Лекин, марҳумнинг қариндошларининг фикрича ўша куни рулда ҳокимнинг биринчи ўринбосарининг ҳайдовчиси бўлмаган. Қариндошлар гувоҳларнинг сўзларига таяниб автомобиль бошқарувида ҳокимнинг ўзи ёки унинг ўғли бўлган дея таъкидламоқда. Таъкидлаш жоиз, ушбу ҳодисадан сўнг ҳоким ҳайдовчисини алмаштирган. Ҳуқуқни муҳофаза қилувчи органлар ҳолат бўйича тергов ҳаракати бошланганини ва яқин вақтларда ҳодиса ҳақида қўшимча маълумотлар тақдим этилишини таъкидлаган.
