Пойтахтда аёл уйини инсу-жинсдан тозалайман деб тақинчоқларидан айрилиб қолди. Бу ҳақда ҳуқуқ тартибот органлари хабар қилди.
Маълум бўлишича, ўтган йили 29 октябрь куни лўли миллатига мансуб аёл 58 ёшли Гулчехра М. Яккасарой тумани Тошбулоқ кўчасида жойлашган уйга кириб борган. У хонадонга келиб икки дона аёл ва эркак қўғирчоқларини ҳамда ўзи билан олиб келган араб тили ёзувлик қоғозларни ҳовлига ташлаб қўйган. Шундан сўнг ўша уйда яшовчи Насиба А.га уйига дуо ўқитилганини айтиб, уни алдаган. Гулчехра М. Насибага уйини “тозалаб” беришини айтиб, унинг 12,5 млн сўмлик тилла тақинчоқларини қўлга киритиб, яширинган.
Ушбу ҳолат юзасидан фирибгарлик билан жиноят иши қўзғатилган ва лўли миллатига мансуб аёл қўлга олинган. Аёлга нисбатан айблов эълон қилинган ва тегишли судловда кўриб чиқиш учун туман прокуратурасига юборилган.