Ўзбекистонда 2020 йилда мансабдорлар жиноят қилиш натижасида давлатга қанча зарар келтиргани маълум бўлди. Бу бўйича таҳлил Бош прокуратура томонидан тақдим этилди.
Таҳлил натижаларига кўра, ўтган йили мамлакатимизда 1148 та жиноят иши очилган бўлиб, 1723 нафар мансабдор жавобгарликка тортилган. Уларнинг 9 нафари республика, 45 нафари вилоят ва 1669 нафари туман-шаҳар миқёсидаги вазирлик, идора ва ташкилотларда фаолият юритувчи шахслардир. Мансабдорларнинг 835 нафари ўзганинг мулкини ўзлаштириш ва растрата йўли билан талон-торож қилиш, 227 нафари фирибгарлик, 132 нафари пора олиш (бериш) ва пора олиш-беришда воситачилик қилиш, 58 нафари мансаб мавқеини суиистеъмол қилиш, 31 нафари мансаб ваколати доирасидан четга чиқиш, 25 нафари мансабга совуққонлик билан қараш, 16 нафари мансаб сохтакорлиги ва 399 нафари бошқа жиноятларни содир этишган.
Мазкур жиноятлар орқали давлатга 500,1 млрд. сўмлик зарар етказилган. Ушбу зарарнинг 355,7 млрд. сўми ундирилган.
