Сирдарё вилоятида “жиходчилар” экстремистик оқимининг яширин гуруҳи аъзолари ушланди. Улар ДХХ ва ИИВ томонидан амалга оширилган тадбир натижасида қўлга олингани маълум қилинди.
Хабар қилинишича, ушбу гуруҳнинг 2 нафар етакчиси Россияда ишлаб юрган вақтида радикал гуруҳ таъсирига тушиб қолган. Сирдарёга келгач эса ўзларининг тарғиботларини ушбу ҳудудда ҳам давом эттирган. Улар ижтимоий тармоқларда тақиқланган материалларни тарқатиб ёшларнинг онгини заҳарламоқчи бўлган. Шунингдек, улар Суриядаги террорчиларни ҳам молиявий таъминлаб турган. Хусусан, гуруҳ аъзолари Сардобадаги тошқинда талофат кўрган масжидни қайта таъмирлашга маблағ йиғиш мақсадида Телеграмда гуруҳ очиб, одамларни алдаб пул олган. Ушбу маблағлар эса Сурияга жўнатилган.
Гуруҳ аъзолари карантин бекор қилиниши билан Сурияга чиқиб кетмоқчи бўлган. Уларнинг уйлари тинтув қилинганда ашёвий далиллар топилган. Ҳозирда ҳолат юзасидан тергов-суриштирув ишлар давом эттирилмоқда.
