Бугун, 23 январь куни ижтимоий тармоқларда бир эркакнинг бўйнидан арқон ўтказилиб, уни қийнашаётгани акс этган видео тарқалди. Видео телеграм каналларда эълон қилинди.
Видеода ақли заифлиги айтилаётган эркакнинг бўйнига арқон солинганини кўриш мумкин. Ушбу ҳаракатни амалга оширган эркак эса видео ортида кулиб турганини эшитиш мумкин. Маълум бўлишича, ҳодиса Навоий вилоятининг Навбаҳор туманида содир бўлган. Вилоят ҳуқуқ тартибот органларининг хабар қилишича, видеода қийналаётган шахс 2-гуруҳ ногирони Ш.У. Ҳодиса эса кеча, 22 январь куни содир бўлган.
Видеога фуқаро П.К. ўзининг уйидаги молхонасида шунчаки ҳазил учун олгани маълум қилинди. Фуқаро видеони дўстларига ташлаган ва видео қандай қилиб тармоқларда тарқалиб кетганидан бехабарлигини билдирган. Ҳолат юзасидан суриштирув ишлари олиб борилмоқда.