Тошкент шаҳри Шайхонтоҳур тумани ҳокими Абдуқаҳҳор Тўхтаев ёшлар билан учрашди. Ҳоким туманга раҳбарлик қилаётганига 50 кун бўлди. Ушбу давр давомида қандай ишлар амалга оширганини ҳоким ёшларга сўзлаб берди. Бу ҳақда ЎзА хабар қилди.
– Мен иш фаолиятимни мастерликдан бошлаганман, – деди А.Тўхтаев. – Шундан сўнг турли лавозимларда ишладим. 23 йил аввал ҳам Шайхонтоҳур туманида ҳоким сифатида ишлаган эдим. Тақдир тақозоси билан яна шу туманда фаолиятимни давом эттиряпман. 50 кун ичида турли лавозимдаги 15 раҳбар ходимни ишдан бўшатиб, ўрнига шижоатли ёш кадрларни қўйдим. Чунки Шайхонтоҳур ижтимоий-иқтисодий ривожланиш бўйича Тошкент шаҳрининг бошқа туманларидан орқада турибди. Фаолиятимни туманни ободонлаштиришдан бошладим. Тумандаги 50 та маҳалланинг ички кўчаларини босқичма-босқич асфальт қилишни бошладик. Баъзи кўчалар умуман асфальт қилинмаган эди. Тез орада барча маҳалланинг кўчалари текис ва равон бўлади. Туманда бир қарич бўш жой йўқ. Уйлар зич қурилган, йўллар тор. Шундай бўлса ҳам кўп қаватли уйлар олдида ноқонуний гаражлар қурилган. 850 та ноқонуний қурилма аниқланди ва 700 таси бузиб ташланди. Қолган 150 тасини ҳам бузиб ташлашга мажбурмиз, деди ҳоким.
Маълумот ўрнида, Шайхонтоҳур туманида 42 та мактабгача таълим муассасаси бор. Ҳудуддаги мактаб ёшигача бўлган болаларнинг 59 фоизи МТМларга қамраб олинган холос.
Шайхонтоҳур тумани Мактабгача таълим бўлимига бино йўқлиги сабаб 82-мактабнинг тўртинчи қаватидан хоналар ажратилган. Тумандаги айрим маҳалла фуқаролари йиғини идоралари мактабдан ажратилган хонада ишлашга мажбур бўлмоқда.
