Ўқув курсининг биринчи кунида O'zLiDeP, “Миллий тикланиш”, “Адолат” партияларининг вакиллари ва маҳаллий Кенгаш депутатларидан иборат учта гуруҳ учун машғулотлар ташкил этилди. Ушбу машғулотлар давомида Урганч давлат университети профессор-ўқитувчилари Президентининг Олий Мажлисга Мурожаатномаси ҳамда Ўзбекистон Республикасини янада ривожлантириш бўйича Ҳаракатлар стратегияси асосида мамлакатда амалга оширилаётган ислоҳотларнинг мазмун-моҳиятига бағишланган маърузалар билан чиқдилар.
-Жойларда сайловчилар билан учрашувлар ўтказганимизда турли муаммолар ўртага ташланади. Уларнинг кўпчилигини ижтимоий соҳалар билан боғлиқ масалалар ташкил этади. Кўтарилган масалаларни ҳал этиш, ислоҳотларнинг туб моҳиятини сайловчиларга етказишда биз депутатлардан катта масъулият ва билим талаб этилади. Инсон етарлича билимга эга бўлмай туриб, бошқаларни ўз ортидан эргаштира олмайди. Шу боис мазкур ўқувда мустаҳкамлаган билимларимиз асосида аҳоли билан учрашувларда тарғибот-ташвиқот ишларини кучайтириб, халқимизнинг ҳам сиёсий билимини оширишга ўз ҳиссамизни қўшишимиз лозим, - дейди Халқ депутатлари Урганч шаҳар Кенгашидаги O'zLiDeP депутатлик гуруҳи раҳбари Дониёр Жуманиёзов.
Маълумот ўрнида шуни айтиш жоизки, мазкур ўқув курслари март-май ойлари давомида босқичма-босқич маҳаллий кенгаш депутатлари ва партиялар вакилларининг сиёсий билимларини оширишга хизмат қилади.
13 мартга қадар давом этадиган мазкур 1-босқич ўқувлари давомида олинган билимлар партия ривожи учун хизмат қилишига шубҳа йўқ.
O'zLiDeP Хоразм вилоят Кенгаши
матбуот хизмати
матбуот хизмати
