ДХХ 2020 йилда террористик актларнинг олдини олди. Бу ҳақда EVERYDAY.UZ мухбири хабар қилди.
Маълум бўлишича, ДХХ ўтган йили 4 та террористик актларнинг олдини олган. Уларнинг иккитаси Ўзбекистонда ва яна иккитаси МДҲ давлатларида содир бўлиши керак бўлган.
Шунингдек, ДХХ матбуот хизматининг маълумот беришича, 2020 йилда экстремистик ва террористик ташкилотларнинг 67 та яширин гуруҳлари фаолиятига чек қўйилган ва улар билан алоқада бўлиб, хорижда яшириниб юрган 98 нафар ўзбекистонлик олиб келиниб, жавобгарликка тортилган.
Шу билан бирга, уларнинг саъйи ҳаракатлари билан 747 кг.дан ортиқ гиёҳванд моддалар, 251 минг дона психотроп таблеткалар, 594 дона қурол, 4.781 дона ўқ-дори ва 24,4 кг портловчи моддалар ноқонуний муомаладан олинган. Коррупция билан боғлиқ 540та ҳолатларга чек қўйилди.
Матбуот хизматининг қўшимча қилишича, ноқонуний миграция ва одам савдосига алоқадор 102 та жиноий гуруҳ фош этилган ва чегарадан ноқонуний олиб ўтилган 58,3 млрд. сўмлик товар-моддий бойликлар қўлга олинган.
Маълумот ўрнида, бугун, 5 апрель куни юртимизда – Давлат хавфсизлик хизмати куни нишонланмоқда.
