Ўзбекистонда энди жамоат жойларида ибодат либосида юриш мумкин бўлади. Бу ҳақда EVERYDAY.UZ мухбири хабар қилди.
Маълум бўлишича, давлат раҳбари «Виждон эркинлиги ва диний ташкилотлар тўғрисида»ги қонуннинг янги таҳририни имзолаган. Унга кўра, янги таҳрирда қуйидаги асосий ўзгаришлар кузатилган.
- Фуқароларнинг жамоат жойларида ибодат либосларида юришларига йўл қўйилмаслиги ҳақидаги чеклов бекор қилинди;
(4 июлга қадар амалда бўлган қонуннинг 14-моддасига кўра Ўзбекистон Республикаси фуқароларнинг (диний ташкилотларнинг хизматидагилар бундан мустасно) жамоат жойларида ибодат либосларида юришларига йўл қўйилмасди).
- Диний ташкилот тузиш учун ташаббускорлар сони 50 нафар этиб белгиланди;
(эски қонуннинг 8-моддасига кўра 100 нафардан кам бўлмаслиги керак эди).
- Диний ташкилотни рўйхатдан ўтказиш бўйича берилган аризани кўриб чиқиш муддати 1 ой этиб белгиланган;
(эски қонуннинг 11-моддасига кўра бу муддат 3 ойни ташкил қиларди).
- Диниий ташкилот раҳбарининг Ўзбекистон фуқароси бўлиши тўғрисидаги талаб чиқариб ташланди;
- Диний ташкилотни давлат рўйхатидан ўтказишда маҳалла фуқаролар йиғинлари розилигини олиш тартиб-таомили мутлақо бекор бўлди.
Таъкидлаш жоиз, энди Маъмурий жавобгарлик тўғрисидаги кодекснинг 184-1-моддаси (Фуқароларнинг жамоат жойларида ибодат либосларида юриши) ҳам ўз аҳамиятини йўқотди.
