Аввалроқ хонанда Жасур Умиров вояга етмаган қизни зўрлаганликда айбланиб, қўлга олингани ҳақида ёзган эдик. Хонанда Самарқанд вилоятида ушланган ва унга нисбатан ЖКнинг 118 моддаси 3-қисми “а” банди билан жиноий иш қўзғатилган.
Умировнинг айби исботланса у 10 йилдан 15 йилгача “кесилиб” кетиши мумкин. Умировнинг иши Самарқанд вилояти прокурори назоратида турибди.
EVERYDAY.UZ таҳририяти Умиров билан боғлиқ можароли ҳолатнинг хронологиясини тузиб чиқди. Хонанда сўнгги вақтларда янги қўшиқ ва клиплар билан эмас, балки можароли ҳолатлар билан барчанинг эътиборини ўзига тортди.
- 2019 йил апрель ойида ОАВда хонанда 15 суткага қамалгани ҳақида хабарлар тарқалди. Хонанда унинг севгилисига уйланган танишига ҳужум қилган. Умиров ўзининг Каптивасида танишининг уйининг дарвозасига бир неча марта урган. Кейинчалик хонанда пичоқ билан қўрқитиб, ҳақорат қилган. Лекин яхшиямки ҳолат яхшилик билан якун топган.
- 2020 йил май ойида тармоқларда хонанда Жасур Умиров Каптива автомашинасаининг эшикларини тепаётгани акс этган видео тарқалди. Карантин қоидаларига қарамай Умиров видеода ниқобсиз юрганини ва жамоат тартибини бузаётганини кўриш мумкин. Ўшанда хонанда жазоланмаган.
- 2020 йил октябрда Умиров ҳамкасби Алишер Раҳматуллаев билан ҳам ғижинглашган. Умиров ўзининг видеомурожаатида ҳамкасбини ҳақоратлаб, муносабатларни мушт билан ҳам ҳал қилишга тайёр эканини айтган.
Ушбу барча ҳолатлар сўнгги икки йилда содир бўлган. Минг афсуски, "Одамларнинг тўйи", "Вай-вай" ва "Жумагул" номли хит тароналар ижрочиси сўнгги йилларда муҳлислари кўз ўнгида хонанда сифатида эмас, балки безори инсон сифатида ёдда қоладиган бўлди.
