Ўзбекистон Республикаси Президенти Администрацияси ҳузуридаги Ахборот ва оммавий коммуникациялар агентлигида 2019/2020 ўқув йилига бағишланган матбуот анжумани бўлиб ўтмоқда.
Унда Давлат тест маркази директори М.Каримов таъкидлашича, бу йил ОТМга қабул учун тест имтиҳонлари ўтадиган биноларга ўрнатилган кузатув камералари сони кўпайтирилади. Тест синовларига тақиқланган нарсаларни олиб киришнинг олдини олиш чоралари кучайтирилади.
Бу йил абитуриентлар ўзи яшайдиган ҳудудда республикамизнинг бошқа жойларидаги ОТМга ҳужжат топшириши ва тест имтиҳонидан ҳам ўз ҳудудидаги белгиланган жойда ўтиши мумкин. Фақат улар рўйхатга олинаётганида қаерда тест топширмоқчилигини кўрсатиши керак. Тест жараёни телевидение орқали жонли ёритилади.
Абитуриентлар бир вақтнинг ўзида 3 та йўналишга ҳужжат топшириши мумкин. Бу ҳақда Давлат тест маркази сайтида батафсил маълумот бор. Абитуриентлар тест топширган куннинг эртасига тўплаган балли ҳақида маълумот олиш имконига эга. Тест синовлари республикамиз ОТМларида 25 июль – 20 август кунлари бўлиб ўтади? дея маълум қилди ЎзА.
