Ўзбек муҳожирлари Россия меҳнат бозорига қайтмоқда ва ўз даромадини ўстирмоқда. Бу ҳақда "Minbar.uz" Россия Марказий банкининг сўнгги маълумотлари таяниб хабар қилди.
2019 йилнинг биринчи чорагида Ўзбекистон фуқаролари Россиядан Ўзбекистонга $818 млн жўнатган. Ўтган йилнинг худди шу даврида $726 млн жўнатилган эди.
Бунинг натижасида Россиядан пул жўнатмалар бўйича Ўзбекистон МДҲ мамлакатлари ичида етакчилигини мустаҳкамлади.
Ўзбекистон шунингдек Россиядан кўпроқ пул юборилаётган кам сонли мамлакатлардан бирига айланди. Бу Ўзбекистон фуқаролари Россия меҳнат бозорига қайтаётгани ва ўз даромадини ўстираётганидан далолат беради.
Тожик, қирғиз ва арманлар ўз ватанига ўтган йилга нисбатан камроқ пул юборган. Мутахассисларнинг фикрича, бунинг сабаби тожик, қирғиз ва арманлар кўпроқ Россия фуқаролигини олишга интилаётгани, оиласини ҳам Россияга тортаётганидадир.
Жами 2018 йилда Россиядан Ўзбекистонга $4 млрд пул жўнатилган. Ушбу кўрсаткичга кўра, Ўзбекистон МДҲ мамлакатлари орасида биринчи ўринни (иккинчи ўринда Тожикистон - $2,5 млрд) ва барча мамлакатлар орасида иккинчи ўринни (биринчи Швейцария - $9,1 млрд) эгаллаб турибди.
Ўтган йиллар билан таққослаганда, Россиядан Ўзбекистонга пул жўнатмалари миқдори ортиб бораётганини кўриш мумкин - 2017 йилда $3,9 млрд, 2016 йилда - $2,7 млрд, 2015 йилда - $3 млрд. Энг катта кўрсаткич Россия Қримни қўшиб олишидан олдинги 2014 йилга тўғри келди - 5,6 миллиард доллар.
