Фуқаролик ишлари бўйича Фарғона туманлараро судининг 2018 йилдаги ижро варақасига асосан Фарғона шаҳар, "Ёруғлик" кўчасида яшовчи фуқаро А.Жўраевдан Қирғизистон Республикаси Ўш вилояти А.Навоий кўчасида яшовчи М.Абидова фойдасига 88,4 млн. сўм қарз ундириш белгиланган.
Мазкур ҳолат юзасидан Мажбурий ижро бюроси Фарғона шаҳар бўлими томонидан ижро иши юритуви қўзғатилган ва суд қарори ижросини таъминлаш ҳақида қарздорга 15 кунлик ихтиёрий муддат берилган.
Бироқ, қарздор А.Жўраев чет эл фуқароси М.Абидовага 88,4 млн. сўм қарзини осонликча бериб қўймасдан давлат ижрочисининг чақирувларига жавоб бермаган ва доим “чап беришга” ҳаракат қилиб келган.
Мажбурий ижро ҳаракатлари давомида қарздорнинг яшаш манзилидан эҳтиёжидан ортиқча мулк аниқланмаган, номига расмийлаштирилган кўчмас мулк ва банкларда пул маблағлари мавжуд бўлмаса-да, унга тегишли “Кобальт” русумли автомашинаси борлиги аниқланган.
Автомашинага нисбатан тегишли идораларга тақиқлар қўйилди, лекин қарздор ҳа деганда автомашинани давлат ижрочисига бериб қўймади, анчагача яшириб юрди. "Бузоқнинг югургани сомонхонагача" деганларидек, МИБнинг шаҳар бўлими ва шаҳар ЙХҲБ ходимлари ўзаро ҳамкорликда ўтказилган рейд натижасида 03.04.2019 йилда қарздор А.Жўраев ушбу автомашинани бошқариб юрган вақтда ушланган ва автомашина белгиланган тартибда ҳужжатлар расмийлаштирган ҳолда хатланиб жарима майдончасига киритилган.
Давлат ижрочиси томонидан автомашинани баҳолаш ва очиқ онлайн савдоларига киритилган, шундагина қарздор автомашинадан айрилиб қолишдан чўчиб ундирувчи М.Абидовани етаклаб МИБ шаҳар бўлимига кириб келди ва шу ернинг ўзида унга 87 млн. сўм қолган қарздорликни тўлиқ санаб топширди, дея хабар қилди ЎзА.
