Учқўрғон туманининг “Обод гулистон” маҳалласида Катта Фарғона каналига қурилган кичик ГЭС каскадлари ишга туширилган.
Тантанали маросимда Хитой элчиси Цзян Янь, “Ўзбекгидроэнерго” мутасаддилари, хитойлик ҳамкорлар вакиллари, журналистлар қатнашган (суратда).
Умумий қиймати 31 миллион АҚШ долларига тенг бу лойиҳа “Ўзбекгидроэнерго” АЖнинг 22,3 миллион доллар ўз маблағлари ва Хитойнинг “Эксимбанк”и томонидан ажратилган кредит ҳисобига қурилган. Лойиҳанинг ўзини ўзи қоплаш муддати 8,5 йил деб белгиланган.
6 мегаваттлик икки кичик ГЭСдан иборат каскад Катта Фарғона каналининг ПК 142 ҳамда ПК 184 участкалари оралиғида жойлашган.
Бу кичик ГЭС каскадлари ишга тушиши натижасида Наманганда электр энергияси ишлаб чиқариш йилига 72,89 млн. квт/соатга ортган. Энди Учқўрғон туманидаги 48 минг хонадон экологик тоза технологияларда ишлаб чиқарилган электр энергияси билан таъминланиши айтиляпти.
Дарвоқе, Тўрақўрғон иссиқлик электр станциясининг биринчи буғ-газ қурилмаси 2019 йилнинг сентябрь ойида, иккинчиси декабрь ойида ишга туширилиши режалаштирилган. Шу билан водий вилоятларида чироқ ўчишининг олди олиниши керак, дея маълум қилди "Zednews".
Президент Шавкат Мирзиёевнинг февралда Наманганга ташрифи чоғида (https://t.me/ZnewsZ/2164) станцияда амалга оширилаётган ишлар билан танишганди.
