Тошкент вилояти Янгийўл шаҳрида «арзон» беш қаватли уйлар қуриш учун икки қаватли уйларни шошма-шошарлик билан бузишмоқда, деб хабар бермоқда "Дарё".
Блогер Safari ёзишича, «мансабдорлар янгидан янги қовунларни тушириб чарчашмаяпти». Бу сафар эътибор марказига Янгийўл туман ҳокими ўринбосари Алишер Усмонов тушган.
«Газета.uz» мақоласида қайд этилишича, журналистнинг «Янгийўл шаҳридаги бузилишлар ҳақида нега уй эгаларига қонуний берилиши керак бўлган 6 ойлик муддат инобатга олинмаяпти ва фуқаролар тезкорлик билан кўчириляпти?» — деган саволига ҳоким ўринбосари: «Сиз Президентнинг шаҳар кўркини яхшилаш бўйича қарорига қаршимисиз?» — дея жавоб берган.
«Бу ҳар икки гапнинг бирида ‘сиёсатга қаршимисан’ дейдиганлар услубидан бўлипти. Йўқ, биз сиёсатга ҳам, Президент қарорига ҳам қарши эмасмиз. Лекин сиз 6 ойлик қонуний муддатни четга суриб, тезкор равишда бузиш ишларини бошлаб қўйган ҳолда Президентнинг бошқа сўзларига қарши чиқмоқдасиз, ўртоқ замҳоким, — деб ёзади блогер. — Шаҳар ободонлаштирилиши, чиройли бўлиши яхши. Бироқ бу аҳолининг ҳуқуқ ва эркинликлари бузилиши ҳамда норозилиги эвазига бўлмаслиги керак».
