Ижтимоий тармоқларда ҳомиладор аёл туғруқхонага қабул қилинмагани акс этган видео тарқалди. Видео телеграм каналларда эълон қилинди.
Маълум бўлишича, шу йил 29 апрель куни 2000 йилда туғилган ҳомиладор аёл туғруғи яқинлашгач Тошкент шаҳар 1-сонли туғруқ комплексига келган. Лекин аёл Самарқанд вилояти, Иштихон туманида доимий рўйхатда тургани учун шифохонага қабул қилинмаган ва унга ҳозирда яшаб турган ҳудуди – Янгийўл туманидаги шифхонага ёки Тошкент тиббиёт академиясининг 1-клиникасига бориш тавсия қилинган. Шундан сўнг аёлнинг турмуш ўртоғи тез ёрдам чақириб, Тошкент тиббиёт академиясининг 1-клиникасига аёлини олиб борган ва ўша ерда унинг кўзи ёриган. Аёлнинг аҳволи яхши бўлгач ва боланинг саломатлиги жойидалигига ишонч ҳосил қилингандан сўнг уларга 3 май куни жавоб берилган. Тармоқларда аёлнинг кўзи ёриш арафасида бўла туриб Тошкент шаҳар 1-сонли туғруқ комплексига қабул қилинмагани акс этган видеонинг кенг тарқалганидан сўнг эса ССВ вазири бу бўйича тезкор йиғилиш ўтказган.
Йиғилиш натижасига кўра Тошкент шаҳар ССБ бошлиғининг оналик ва болаликни муҳофаза қилиш ҳамда репродуктив саломатлик бўйича ўринбосари Р.Ҳаитбоева, туғруқ комплекси бош шифокори Р.Олимжонова ишдан олинган. Шунингдек, вазифасини сидқидилдан бажармаган бир қатор ходимларга ҳам тегишли чоралар кўрилган.
