Mening Fikrim порталига транспортларнинг ҳаракат тезлигини чеклаш бўйича петиция жойлаштирилди. Ҳужжатга кўра, муаллиф йўл ҳаракати қоидаларининг амалдаги талабларига ўзгартириш киритишни таклиф қилган. Хусусан, шаҳар ҳудудида тезликни 50 км/соатгача, мактаб, боғча, шифохона ва бошқа ижтимоий объектлар ҳудудида эса 30 км/соат қилиб белгилаш таклиф қилинган.
Муаллифнинг келтиришича, автомобиль қуйидагича тезликда келиб пиёдани урса
50 км/соатда – 80 фоиз,
40 км/соат тезликда – 40 фоиз
30 км/соат тезликда – 13 фоиз пиёдалар вафот этади. Бу ЖССТ томонидан келтирилган статистик маълумот экани таъкидланган.
Ушбу маълумотларга кўра, агар автомобиль 30 км/соат тезликда келиб урса кўп ҳолатда пиёда тирик қолади ва оддийгина тан жароҳати олади. Шунингдек, автомобиль 50 км/соат тезликда ҳаракатланса аянчли ҳолат кузатилиши мумкинлиги таъкидланди.
Мазкур ҳужжат кейинчалик тасдиқланиши учун 3 ой давомида камида 10 мингта овоз йиғиши керак. Уни кўриб чиқиш ҳамда тегишли ташкилот билан қарор қабул қилиш вақти эса 60 кунни ташкил қилади.
