Республика Ички ишлар вазирлиги кеча уюшган жиноий гуруҳ аъзолари мамлакатдаги вазиятни беқарорлаштириш мақсадида бевосита Хитойнинг Шинжон-Уйғур автоном райони билан чегара чизиғида Душанбе-Кўлма автомобил йўлини тўсиб қўйгани ҳақида хабар берди.
Қайд этилишича, жиноятчилар “халқаро террорчилик ташкилотлари кўмагида мамлакатдан ташқарида қурол-яроғ ва ўқ-дорилар олган, шунингдек, террорчилик ҳужумлари ва бошқа провокация шакллари учун хорижий ёлланма аскарларни жалб қилган”.
Магистрал йўлда ҳаракатланишни тиклаш учун ҳуқуқ-тартибот идоралари аксилтеррор операциясини бошлади, деб ёзади “Закон.кз”.
Айрим оммавий ахборот воситаларининг ёзишича, ҳақиқатда Рушон вилоятида ҳукумат қўшинлари ва Тоғли Бадахшон мухтор вилоятининг Хоруғ йўлини тўсиб қўйган аҳоли ўртасида тўқнашувлар бўлган. Тўқнашувларда бир неча киши жароҳатлангани айтилмоқда.
Эслатиб ўтамиз, 14 май куни Хоруғ шаҳрида бир неча юз киши вилоят раҳбари ва шаҳар ҳокимининг истеъфосини талаб қилиб, митингга чиққан эди. Расмийлар истеъфони кўриб чиқишдан бош тортди ва намойишчиларнинг ҳаракатлари терроризм сифатида баҳоланишини таъкидлади.
