Ҳарбий суд Ўзбекистон фуқаросини Россияда тақиқланган ИШИД террорчилик ташкилотини молиялаштирганликда айблаб, саккиз йилга озодликдан маҳрум қилди.
Унинг Ўзбекистон сўровига кўра Россия Федерациясидан экстрадиция қилиниши инсон ҳуқуқлари бўйича Европа суди қарори билан тўсиб қўйилди, деб ёзади “ТАСС”.
“Ислом давлати” халқаро террорчилик ташкилотини молиялаштирган Ўзбекистон фуқароси Жавоҳир Эшонқуловга нисбатан иккинчи Ғарбий округ ҳарбий судининг ҳукми қонуний кучга кирди. У 8 йил муддатга озодликдан маҳрум этилди ва жазони қаттиқ режимдаги колонияда ўташ учун ҳукм қилинди.
2021 йилда Эшонқулов Федерал хавфсизлик хизмати томонидан ҳибсга олинган.
“Аниқланишича, маҳкум 2013 йилдан буён халқаро террорчилик ташкилоти лагерларига жангариларни ёллаш ва ўтказишда иштирок этгани учун Ўзбекистон Республикаси ҳуқуқни муҳофаза қилиш органлари томонидан давлатлараро қидирувга берилган”, - дея таъкидлади ФСБ.
Шу билан бирга, Россия томонининг уни ватанига экстрадиция қилишга уринишларига Европа Инсон ҳуқуқлари суди чет эл агенти мақомига эга инсон ҳуқуқлари тузилмалари кўмагида тўсқинлик қилди.
“Шундай қилиб, Эшонқулов Россияда қолиб, яна бир неча йил ноқонуний фаолиятини давом эттириш имкониятига эга бўлди”, — дейилади ФСБ хабарида.
