15 май куни Андижон вилоятида уч киши ЙПХ ходимини ўлдириш билан таҳдид қилган. Бу ҳақда “Миллий” телеканалидаги репортаж давомида маълум бўлди.
Маълум бўлишича, инспектор хизмат кўрсатиш вақтида Каптива русумли автомашинани кўрикдан ўтказиш учун тўхтатиб, давлат рақами бошқа автомобилга тегишли эканлигини аниқлаган. Ҳайдовчи ва унинг икки дугонаси ҳуқуқ-тартибот органи ходимига таҳдид қила бошлаган, унинг рацияси, планшети, нишонини олиб, воқеа жойидан қочиб кетган.
Айни пайтда 3 нафар фуқаро Жиноят-протсессуал кодексининг 221-моддасига асосан ушланган. Мазкур ҳолат юзасидан туман прокуратураси томонидан 219-модда (Ҳокимият вакилига ёки фуқаролик бурчини бажараётган шахсга қаршилик кўрсатиш) бўйича жиноят иши қўзғатилган.
