Қашқадарёдан Тошкентнинг "Чорсу" бозорига олиб келинаётган салкам 3 тонна қўланса гўшт тўхтатиб қолинди. Бу ҳақда "Янги Ўзбекистон" нашри хабар қилди.
Маълум бўлишича, Жиззахнинг Ғаллаорол туманидаги Сангзор-15 ЙПХ масканида Қашқадарёдан Тошкент томон ҳаракатланган автомашинанинг юкхонаси текширилганда ҳеч қандай ҳужжатларсиз олиб кетилаётган 2 тонна 640 килограмм қўланса ҳидли гўшт аниқланган. 34 ёшли ҳайдовчидан сўралганда ушбу гўштлар Тошкентдаги "Чорсу" бозорига сотиш учун олиб кетилаётганини айтган. Гўштлар Жиззахдаги музхонага олиб борилган.
Ҳозирда ҳолат юзасидан суриштирув олиб борилмоқда ва гўштлар лабораторияга топширилган.
Аввалроқ айнан ушбу ЙПХ масканида Қашқадарёдан Тошкентга олиб кетилаётган 1,5 тоннадан ортиқ гўшт тўхтатиб қолинган эди.
