Абдурайим Абдуваҳобов коронавирусдан вафот этдими? Ушбу саволга жавоб топиш мақсадида "Дарё" мухбири Абдуваҳобовнинг дўсти, Ўзбек миллий академик драма театри директори Фатҳулла Маъсудов билан суҳбатлашди.
Маъсудовнинг айтишича, Абдурайим Абдуваҳобов коронавирус қурбони бўлгани йўқ. Марҳум онкологик касаллик сабаб шифохонада даволанаётган бўлган.
"Тақдир экан, 14 июль куни саҳар вафот этди. Турли миш-мишларнинг барчаси ёлғон. Яқин дўстим ва ҳамкасбимнинг охирати обод бўлсин илоҳим!", - дейди Ўзбек миллий академик драма театри директори Фатҳулла Маъсудов.
Шунингдек, СЭОА расмийси ҳам ижтимоий тармоқларда тарқалган хабарларни рад этди. Абдуваҳобов 10 кун аввал ўз ихтиёрига кўра корнавирусга тест топширган ва ўшанда унинг натижаси яхши чиққан.
"Агар унда коронавирус аниқланганида, ўша заҳотиёқ назоратга олиб, махсус шифохонага ётқизардик ва даволанишига ёрдам берардик. Унинг коронавирус қурбони бўлгани ёлғон", - дейди СЭОА матбуот котиби Муҳаммаджон Бозоров.
