Қашқадарё ва Наманганда СЭОМ мансабдорлари миллиардлаб пулларни талон-тарож қилди. Бу ҳақда Бош прокуратура "Халқ сўзи online"га хабар қилди.
Маълум бўлишича, Қашқадарё вилоят санитария-эпидемиология осойишталик марказининг собиқ раҳбари Ш.Шеров, марказнинг бошқа бир ходими Б.Боймуродов ҳамда бошқалар тил бириктириб, жуда катта миқдорда пулларни талон-тарож қилган. Хусусан, улар марказга тушиши керак бўлган 480,1 млн. сўмни, шунингдек, у ерда ишламайдиган инсонларга иш ҳақи ҳисоблаб, ишлайдиганларга ортиқча иш ҳақи ёзиб, 271,6 млн. сўм, “гипохлорид кальций” дизенфекция воситаси ҳақиқий баҳосидан 166,1 млн. сўм қиммат нархда олиб, жами 917,8 млн. сўм бюджет маблағларини ўзлаштириш ва растрата қилиш йўли билан талон-торож қилишганлиги аниқланган.
Шунингдек, Наманган вилоятида ҳам шунга ўхшаш ҳолат қайд этилган. У ерда ўтказилган тезкор тадбирлар давомида вилоят Санитария-эпидемиологик осойишталик маркази мансабдор шахслари ва бошқалар “Farm Family Biznes”, “AVIKON TEX” ҳамда “Hymo Standart” МЧЖлар билан шартнома тузиб, 524,8 млн. сўмлик “гипохлорид калций 65%” дезинфекцияловчи воситаларини сотиб олинган кунидаги биржа нархларидан 248,9 млн. сўмга қиммат нархда сотиб олиб, жуда кўп миқдордаги бюджет маблағларини ўзлаштириш ва растрата қилиш йўли билан талон-торож қилишганлиги аниқланган.
Шу йил 3 июль куни икки вилоятда ҳам юқорида санаб ўтилган шахсларга нисбатан ЖКнинг 167-моддаси 3-қисми “а” банди билан жиноят иши қўзғатилиб, прокуратурага юборилган.