Тошкентдаги туман ҳокимлигида ишловчи мансабдор 16 сотих ерни 352 минг долларга сотмоқчи бўлди. Бу ҳақда Ўзбекистон24 телеканалида эфирга узатилган репортажда маълум қилинди.
Хабар қилинишича, Тошкентдаги туман ҳокимликларидан бирида ишловчи мансабдор шахс Навоийда рўйхатдан ўтган МЧЖга пойтахт ҳудудидан 16 сотих ер ажратиб, унга Тошкент шаҳар ҳокимлигининг тегишли қарорини чиқариб беришни ваъда қилган.
Мансабдор тадбиркордан ҳар бир сотих учун 22 минг доллар, жами 352 минг доллар талаб қилган. ДХХ томонидан ўтказилган тезкор тадбир давомида мансабдор сўралган пулнинг 35 минг долларини олаётганда қўлги олинган. Ҳолат юзасидан ЖКнинг тегишли моддаларига асосан жиноий иш қўзғатилган. Тергов ҳаракатлари олиб борилмоқда.
