Аввалроқ Сирдарёда аёл ўзи ва болаларини каналга чўктириб ўлдирмоқчи бўлгани ҳақида ёзган эдик. Хабарда ҳодиса видеолавҳаси илова қилинган эди.
Видеода болалари ва ўзининг жонига қасд қилмоқчи бўлган аёлни экология ходимлари тўхтатиб қолганини кўриш мумкин. Ходимлар аёлдан нима сабабдан бундай қилмоқчи бўлгани ҳақида сўраганда у бундай яшашдан чарчаганини ва фарзандларини дунёга келтирганидан афсусда эканини айтган.
Сирдарё вилояти Ширин шаҳар ҳокимлиги ушбу ҳодиса бўйича изоҳ берди. Маълум бўлишича, ҳодиса шу йил 15 декабрь куни содир бўлган. Видеодаги аёл 35 ёшли, асли бекободлик А.Р. экани маълум қилинди. У ва фарзандлари Тошкент вилоятининг Бекобод тумани «Туркман» маҳалласида яшаб келмоқда. Ҳодиса Бекобод тумани ва Ширин шаҳрини ажратиб турувчи Дўстлик канали кўпригининг Бекобод қисмида содир бўлган. Аёл эри Э.Ш.ни рашк қилиб шундай ишга қўл урмоқчи бўлгани ойдинлашди. А.Р. эрининг бошқа бир аёл билан телефон орқали баъзи-баъзида суҳбатлашиб туришидан хабардор бўлган. У аччиқ устида шу ишга қўл урмоқчи бўлган.
Ҳолат Бекобод тумани ҳудудида содир бўлгани учун ҳозирда воқеа бўйича суриштирув ишлари Бекобод тумани ИИБ томонидан амалга оширилмоқда.
