Бухорода камбағалликни қисқартириш бўйича халқаро форум бошланди.
Ташкилотчиларнинг маълум қилишича, анжуманда 250 дан ортиқ маҳаллий ва хорижий иқтисодчи олимлар, ҳамкор давлатлар ва халқаро молия институтлари вакиллари иштирок этмоқда.
Кун.уз мухбирининг хабар беришича, очилиш маросимида Президент Шавкат Мирзиёевнинг форум иштирокчиларига мурожаатномаси ўқиб эшиттирилган.
Очилиш маросимида Бош вазир ўринбосари – Иқтисодий ривожланиш ва камбағалликни қисқартириш вазири Жамшид Қўчқоров Ўзбекистонда 2026-йилгача камбағалликни икки баравар камайтириш бўйича амалга оширилиши лозим бўлган чора-тадбирларни санаб ўтди:
• хусусий секторни, жумладан, кичик ва ўрта бизнесни ривожлантириш учун зарур шарт-шароитларни таъминлаш, шу орқали барқарор иш ўринларини яратиш;
инсон капиталини ривожлантириш ва меҳнат унумдорлигини ошириш;
• энергия нархларини либераллаштириш ва самарасиз субсидияларни камайтириш орқали ижтимоий лойиҳаларга ажратиладиган давлат ресурслари ҳажмини ошириш; бу жараёнда кам таъминланган оилаларни ҳимоя қилишга эътибор қаратиш;
• давлат корхоналарини ўзгартириш, хусусийлаштиришни жадаллаштириш, бу жараёнда рақобат ва ишбилармонлик муҳитини яхшилаш;
• қишлоқ хўжалигида ҳосилдорликни ошириш, биринчи навбатда ер ислоҳотини чуқурлаштириш;
• яшил ва рақамли иқтисодиётга ўтишни жадаллаштириш.
