Ижтимоий тармоқларда Ўзбекистонда энергия ресурслари учун ижтимоий норма ойига 200 кВт бўлиши ҳақида маълумот тарқалди. Бундан ташқари, истеъмолчи электр энергиясидан кўпроқ фойдаланса, 1 кВт/соат электр энергияси учун 7500 сўм тўлаши ҳам маълум қилинган.
Энергетика вазирлиги матбуот хизмати хабарига кўра, юқоридаги маълумотлар ишончли эмас. Ўзбекистонликлардан бу хабарларга ишонмаслик сўралган.
Эслатиб ўтамиз, Ўзбекистонда энергетика соҳаси ислоҳ қилинмоқда. Соҳада аҳолининг ижтимоий ҳимояга муҳтож қатламларини, жумладан, пенсия ва болалар нафақаси олувчиларни қўллаб-қувватлаш чоралари кўрилади.
Энергия истеъмолининг "ижтимоий нормаси" деганда аҳоли томонидан пасайтирилган ставкада тўланадиган энергиянинг маълум миқдори тушунилади. Яъни, маълум бир белгиланган қийматгача нисбатан паст (имтиёзли) нархда сотилади ва ундан юқори нархда эркин бозор нархида сотилади.
Тегишли норматив-ҳуқуқий ҳужжат лойиҳаси яқин кунларда умумхалқ муҳокамасига киритилади. Барча фикр ва таклифлар ўрганилади.
