Истеъмолчилар ҳуқуқларини ҳимоя қилиш жамиятлари федерациясига Бухоро вилоятида яшовчи фуқаро А.Назаров томонидан мурожаат келиб тушди. Бу ҳақда федерация матбуот хизмати маълум қилди.
Маълум қилинишича, фуқаро А.Назаров ва “G‘ijduvon Avtotexxizmat” МЧЖ ўртасида тузилган шартномага асосан умумий қиймати 398.000.000 сўм бўлган автомашинани харид қилгани, шартномада кўрсатилганидек, автомобил 7500 км юргандан сўнг мойини алмаштириш мақсадида “Buxoroavtotexxizmat”га мурожат қилгани, усталар машинани кўздан кечириш пайтида унда носозлик борлигини маълум қилишган.
Истеъмолчи ҳолат юзасидан бир неча маротаба “G‘ijduvon Avtotexxizmat” МЧЖга мурожаат қилган, корхона кафолат муҳандиси носоз деталлни 3 ойда олиб келиб беришини айтиб ўтган бўлса-да, орадан қарийб 1 йил вақт ўтганига қарамасдан муаммо ечимсиз қолганини айтиб ўтган.
Шундан сўнг федерация ходимлари томонидан Бухоро туманлараро судига даво ариза киритилди. Суд қарорига асосан “Uzavto Motors” АЖдан истеъмолчи фойдасига 199.000.000 сўм моддий ва 10.000.000 сўм маънавий зарар, қолаверса, давлат фойдасига 14.768.800 сўм маблағ ундирилди.
