Хабар қилинганидек бугун Олий Мажлис Сенати ялпи мажлиси ўз ишинии бошлади. Унда Сенат раиси Танзила Норбоева нутқ сўзлади.
- Йиллар давомида гўёки эришиб бўлмасдек туюлган хорижий валютанинг эркин конвертацияси амалда тўлиқ жорий этилгани иқтисодий тараққиётга кенг йўл очди, - деди Т.Норбоева. - Илгари фақат қоғозларда акс этган қуруқ рақамлардан фарқли ўлароқ, мамлакат ялпи ички маҳсулоти ҳажмининг ўсиши амалда 5,8 фоизга етди.
(Маълумот учун: ушбу кўрсаткич кўп йиллар давомида 8 фоиздан юқори, деб қайд этилган).
Маърузачи тарихимизда биринчи маротаба инвестициянинг ялпи ички маҳсулотдаги улуши 38 фоиздан ошгани ва шу тариқа 86 триллион сўмлик инвестициялар ўзлаштирилгани сармоядорларнинг Ўзбекистонга қизиқиши ва интилиши кескин кучайганидан далолат эканини қайд этди.
Ҳудудларни комплекс ривожлантириш борасида бугунги амалий чора-тадбирлар ҳам тарихий аҳамиятга моликдир. Ғоят қисқа муддатда биргина “Обод қишлоқ” дастури доирасида қарийб 160 тумандаги 480 га яқин қишлоқнинг янгича қиёфа касб этгани миллий давлатчилик тарихида кузатилмаган воқеликдир.
Жорий йил якунига қадар 10 мингта уй-жой ва 110 дан зиёд кўп қаватли уйларни битказиш кўзда тутилгани одамларнинг йиллар давомидаги орзуларининг рўёбга чиқишига хизмат қилади, дея хабар қилди ЎзА.
