Ўзбекистонда банк ва мижозлар ўртасидаги муносабатга Жаҳон банки эксперти Луиза Мамарасулова ўз фикр-мулоҳазаларини билдириб ўтди.
"Бугун Ўзбекистонда кўпгина истеъмолчилар нақд пулларни банк орқали эмас, балки киракашлар ёрдамида жўнатишмоқда", дейди у.
"Бизнинг мижозларимиз ҳозирда норасмий молиявий хизматлардан фойдаланмоқда. Масалан, ота-оналар фарзандларига пул жўнатмаларини киракашлар орқали юборишмоқда. Қарз олиш учун эса ломбардлар, жисмоний шахслар ёки қариндошларга мурожаат қилишмоқда. Банклар мазкур норасмий молиявий хизматлар билан рақобат қилишлари лозим”, деди Луиза Мамарасулова.
Унинг сўзларига кўра, агар банклар мижозларига ўз хизматларини нарх ва тезлик жиҳатидан қулай шароитда тақдим этмаса, мижозлар норасмий молиявий хизматлардан фойдаланишда давом этади.
Экспертнинг фикрига кўра, банкларнинг асосий вазифаси истеъмолчилар ишончини қозонишдир, аммо ҳозирда кўплаб мижозлар банкларга ишонмайди.
"Мен оддий истеъмолчи сифатида банкка келдим. У ерда бўйинбоғ таққан ходимлар ўзларининг тилида – банк тилида гаплашишади. Мен эса бу тилни тушунмайман”, дея таъкидлайди эксперт.
Мамарасулова, шунингдек, банклар янги маҳсулотни мижоз атрофида яратиши лозимлигини ҳам айтиб ўтди. Чунки рақобатда мижозга энг яқин бўлган банк ғалаба қозонади.
Ҳозирда мамлакатдаги тижорат банклари томонидан кўрсатилаётган хизматлар сифати пастлигининг асосий сабаби сифатида Ўзбекистон Марказий банки тижорат банкларининг устав капиталида давлат улуши жуда юқорилигини (деярли 80 фоиз) кўрсатмоқда.
Марказий банк маълумотларига кўра, ўтган йилда тижорат банклари фаолияти бўйича шикоятлар сони 60 мингдан ошган. Шикоятларнинг асосий қисми тижорат банклари томонидан кредит бериш билан боғлиқ.
