Кеча, 28 ноябрь куни Бош вазир Абдулла Арипов раислигида газ ва электр энергияси билан боғлиқ муаммоларга бағишланган видеоселектор йиғилиши бўлиб ўтди.
Йиғилиш танқидий руҳда ўтказилди. Унда Бош вазир соҳага жавобгарлар ишидан қониқмаётганини маълум қилган. Қиш кириб келмасдан шунча муаммо пайдо бўлгани, хатто метро ҳамда телевиденияда ҳам чироқ билан боғлиқ муаммолар пайдо бўлгани кескин танқид қилинган.
Бош вазир буни шармандали ҳолат деб атади. Шунинг билан бирга ушбу соҳага жавоб берувчилар ОАВ ва ижтимоий тармоқларда билдирилаётган ҳақли эътирозларга жўяли жавоб бермаганлиги ҳам муҳокама марказида бўлди. Шунингдек, Энергетика вазирлигининг ушбу йўналишда ишларни амалга оширолмаётганлиги ортидан бутун ҳукуматга нисбатан эътирозлар пайдо бўлаётгани маълум қилинди.
Арипов йиғилишда шунингдек, газ тармоқларига ўзбошимчалик билан уланиш ҳолатлари жудаям кўплиги, натижада жабрини аҳоли кўраётганини ҳам кескин танқид қилди.
