Томорқа ерлардан унумли фойдаланмаганларга жарима солинади. Бу ҳақда Олий Мажлис Қонунчилик палатаси матбуот хизмати хабар қилди.
Маълум бўлишича, бугун бўлиб ўтган йиғилишда Маъмурий жавобгарлик тўғрисидаги кодексга ўзгартириш киритиш масаласи кўриб чиқилган. Унга кўра депутатлар кодексни 651-модда билан тўлдиришни таклиф қилган. Унда томорқа еридан самарали фойдаланмаган фуқароларга жарима солиниши белгиланган.
"Агар фуқаро томорқасига ўзи танлаган маҳсулотни экмаса дастлаб огоҳлантирилади. Кейин БҲМнинг 1 бараваридан 3 бараваригача жарима тўлайди. Агар жарима тўлагандан сўнг бир йил ичида ҳолат яна такрорланса жарима БҲМнинг 3 бараваридан 5 бараваригача бўлади. Бу ўз навбатида озиқ-овқат хавфсизлигини таъминлайди ва аҳоли бандлигига хизмат қилади", - дейилади матбуот хизмати ахборотида.
